ملخص كتاب البذور الكونية

بدأ الكاتب بالكلام عن مشكلتين فى الدارونية .. اولا فكره ان الانتخاب الطبيعى (اللى هى البقاء للاصلح) هو وسيله التطور .. واعتراضه انه جاب امثله عن كائنات و حشرات بتستحمل الاشعه فوق البنفسجية و تحت الحمراء .. فبيقول ايه اللى هيخلى الصفه دى تنتخب او تظهر رغم ان الظروف على الارض مش كده .. و بالتالى الصفه دى ملهاش لازمة .

النقطه التانية هى الطفرات كوسيلة تطور .. فبيقول ان نادر جدا ان تحصل طفره بحيث تعمل تغيير فى صفه .. و ان التغيير ده يكون للافضل باقل اضرار .. فبيقول ان ده مش هيخلى التطور بالسرعه اللى بنشوفها فى السجل الحفرى دى .. و ان التطور بالطريقه دى محتاج وقت اطول بكتير 

ثالثا فكره الحساء العضوى .. و دى بتحكى ازاى الحياه اتكونت اصلا عن طريق حساء عضوى بمعنى كميه كبيره من البروتينات العضويه عايمه فى ميه تحت ظروف الارض الاولى .. بمعنى اشعه فوق بنفسجيه و حراره عاليه و غلاف جوى قليل باكسجين قليل 

فاتجمعت المكونات العضويه دى علشان تكون شريط شبه ال DNA و ظهرت اول خليه 

بيعترض الكاتب على الفكره دى لانة شايف انها محتاجه وقت طويل جدا .. و الخليه اللى هتنتج مش متأكدين اذا كانت هتقدر تتكاثر قبل ما تموت ولا لا .. و مش متأكدين ان الصدفه النادرة دى هتتكرر اكتر من مره علشان نقول انه نتج عدد كبير اولى من الخلايا فيبقى فيه فرصه يتكاثر
و كنوع من الرد على المشكلات دى بيحط الكاتب نظريه اسمها البذور الكونيه و دى بتقول ان الحياه موجوده فى الكون كله .. و بمجرد ما لقت الظروف مناسبه على الارض استقرت و انتشرت و تطورت .. و بيقول ان وصول الكائنات العضويه الدقيقه دى للارض لسه مستمر لحد دلوقتى .. و هو بيعتبره من القوى الدافعه للتطور 

النظريه دى للكاتب شبه نظريه اقدم عملها ارهينوس لكن فيه بعض الفروقات 

مثلا .. ازاى الحياه وصلت للارض ؟ نظريه ارهينوس بتقول ان تيارات الحمل بتشيل البكتريا مثلا و مغناطيسيه الكواكب بتبعتها للفضاء لو كانت مشحونه شحنات بسيطه و بالتالى عدد الكائنات دى مهما كان قليل فى الفضاء ... اما الكاتب فى الكتاب ده فبيقول ان الكائنات الدقيقه موجوده فعلا فى الفراغات بين النجميه و موجوده باعداد كبيره جدا فى السدم اللى نتجت عن انفجار نجوم قبل كده .. و بالتالى كانت موجوده باعداد كبيره وقت تكون الارض و بتكون موجوده برضه فى التلج الموجود فى المذنبات .. و بمجرد ما ظروف الارض بقت مناسبه نزلت باعداد كبيره و استقرت على الارض 

و الغلاف الجوى محرقهاش لان لو الجسم صغير جدا اقل من6 ميكرون زى الفيروسات ممكن يعدى من الغلاف الجوى من غير ما يتحرق او لو هما بينزلوا فى مجموعات كبيره فهيفضل جزء كبير منهم حى .. او محفوظين فى نيازك .. او بيتكاثروا من اول ما وصلوا الغلاف الجوى و بالتالى اللى هيموت منهم هيتكون غيره و هيوصل جزء منهم حى 

النظريه دى بتحل بعض المشاكل فى الدارونية زى مثلا القفزات اللى فى السجل الحفرى اللى بتعبر عن تطور مفاجئ للكائنات .. و بيفسر الكاتب ده بانه نتيجة دخول كائن جديد من الفضاء .. و تفاعله مع الكائنات اللى موجوده اصلا .. ده بيخليها تكتسب صفات جديده .. و ممكن كمان الكائنات الدقيقه من الفضاء دى تأثر بصوره فعاله اكتر على ال DNA من الطفرات 

ضاف الكاتب كمان فكرة تانية ممكن تسبب تطور ال DNA و هى التضاعف .. ان كائن يكون عنده فى الخلايا التناسليه الكروموسومات كامله بدل ما هى نص عدد الكروموسومات زى الطبيعى .. لو اتجوز كائن عنده نفس المشكله هينتجوا كائن فيه ضعف عدد الكروموسومات اللى فى الكائن العادى
و اخيرا .. عمل الكاتب فصل عن فكرة الخطه المسبقه .. بيقول هل التطور ماشى كده بالصدفه ولا فيه خطه مسبقه ..  هو كان بيرجح فكره الخطه المسبقه .. و قال كمان فكره ان مش لازم العقل اللى بينظمها عقل علوى .. لا ممكن يكون العقل ارضى و اتكلم عن الحشرات كمثال ..اننا لو فكرنا هنلاقى انها اكتر كائن عنده القدره على البقاء .. و هو هنا مش بيتكلم عن ذكاء فردى لكن عن ذكاء جمعى او وعى جمعى للحشرات كنوع 

____________________________________________________________________

نظره فى البذور الكونية
اهم نتيجه لو قدرنا نثبت النظريه دى كوسيله للتطور .. هى انه بما ان البذور الكونيه دى او الكائنات العضويه منتشره فى الكون كله باعداد كبيره نسبيا .. يبقى كل كوكب شبيه بالارض ضرورى عليه حياه .. و الحياه دى مشابهه للحياه اللى احنا عارفينها يعنى DNA و انقسام خلوى وهكذا
و يمكن كمان نوع من انواع الذكاء و استخدام الادوات بنفس الطريقه اللى نعرفها على الارض .. و ان دى مش حاجه نادره بالعكس منتشره جدا فى الكون