كتاب تعريف النقد السينمائى

تلخيص لمقدمه كتاب تعريف النقد السينمائى .. لعلى شلش
المقدمه تحت عنوان تعريف .. و هى عباره عن تعريف للسينما نفسها
بيقول الكاتب ان نقدر نعرف ايه هى السينما عن طريق 3 حاجات
اولا الفكره :

فكره السينما هو تتابع من الصور بسرعه شديده بحيث يوحى للمتفرج ان الصوره بتتحرك .. ظهرت على شكل اسطوانات بتتحرك باليد كان بيحركها واحد . و المتفرج بيبص من خرم فيتخيل انها بتتحرك
النقلة التانيه للفكره كانت عن طريق 2 .. واحد اسمة مارى .. وده عالم فى الحيوانات كان عايز يدرس حركه الحيوانات فكان بيصورهم صور متتابعه سريعه .. التانى كان ميبريدج و ده كان مصورمحترف استغله حاكم كليفورنيا علشان يكسب رهان هل الحصان بيرفع رجليه الاربعه عن الارض ولا لا .. راح ميبريدج رص كاميرات  جرى قدامها حصان.. و ربطهم بخيط بحيث لما يشده الكاميرات تلقط صور ورا بعض .. و صور حركه الحصان .. و عجبه الموضوع جدا فقعد يصور حركه اى كائن يشوفه تقريبا
لكن مين اخترع السينما ؟؟؟ - فيه حوالى 87 جهاز شبه كاميرا السينما .. و منقدرش نقول شخص معين اخترعها لان افكار كتير اتقدمت و اغلبها سارق من بعضه

ثانيا التطبيق :

 نبتدى بالاخوان موليير ..  دول اخترعوا كاميرا بتلقط صور سلبيه فلما تتعرض بتبقى معدوله للمشاهد .. و اول فيلم عرضوه كان الخروج من مصانع مولييرو سنه 1895 اجروا صاله لعرض افلامهم اللى كانت مدتها صغيره و بتصور الحياه الخارجية و بعتوا مندوبيين ليهم فى كل بلد فى العالم .. نجحوا زى ما حصل فى روسياو اليابان او فشلوا زى ما حصل فى امريكا بسبب اديسون اللى اخترع جهاز شبه بتاع موليير و استخدمه فى امريكا تجاريا 

بعدها ظهر عدد من الهواه فى فرنسا .. اهمهم جورج ميلييس .و كان اهم التعديلات اللى عملها انه عمل فيلم روائى طويل و انه حرك الكاميرا بعد ما كانت ثابته .. و عمل الخدع السينمائيه و من اشهر افلامة رحله لقمر ..و الفتره دى كان السينما فن ناشئ لسه مظهرلوش ملامح و مرتبط جدا بالمسرح من حيث الممثلين والمخرجين .. و مع بدايه القرن العشرين بدأت هوليود و معاها افلام الwestern ورؤوس الاموال .. واتحلوت هولييود لكعبه لسينما .. كمان ظهر عمالقه السينما زى تشارلى تشابلن مثلا و بدأ النقد السينمائى .
سنه 1927 كانت الخطوة مهمه و هى الصوت .. فى الاول قاومه فنانين كتير واغلبهم مقدرش يتأقلم معاه و اعتقد بعض الفنانين انه هيفقد السينما "روعه التعبير الصامت" و ده طبعا خلى انواع جديده تظهر زى الفيلم الغنائى و الشعرى .. سنه 1934 كمان كانت مهمه لان والت ديزنى قرر فيها يلون افلامة لكن اللون كان تطور محدود لانه مفتحش للسينما امكانيات جديده .

فى الفتره دى قدرت هولييود تغزو العالم وطبعا اتعاملوا مع السينما كصناعه والفن جه درجه تانية .. 

بعد الحرب العالمية التانيه وظهور التلفزيون و منافسه اوروبا لهولييود لجئوا لطريقه تطوير واحده و هى تعديل دار العرض فظهر السينما سكوب و تطورات تانيه كل الاختلاف فيها انها غيرت مقاييس الشاشة .. و طبعا كان ال 3D هو السلاح الاكبر 

اما السينما الاوروبيه المعادية لهولييود بعدالحرب فمختلفه فى 4 نقط 

-الواقعية .. انهم سابوا الاستيوهات و بقوا يصوروا مشاهد خارجية و قصص واقعية اكتر خاصة قصص ما بعد الحرب 

-زى ما قال المخرج شيزارى ان السينما مينفعش تنعزل عن حياة الناس

-الاهتمام بالقيم الفنيه .. رفع المستوى الثقافى السينمائى للجمهور 

-تأكيد لمعنى كلمه سينمائى مقابل كلمه اديب او شاعر .. مش زى هوليود اللى الكلمه الاولى فيها للمنتج

ثالثا الوظيفة :

واضح من البدايه ان وظيفه السينما هى التسلية ..ازاى اتحولت لرؤية فنيه ؟
فى الاول كان الموضوع مغامره و تجربه جديده و الافلام الاولى كانت محاكاه للواقع .. زى ما بنجرب اداه موسيقيه جديده لكن مبنطلعش لسه منها لحن متكامل .. لحد ما فى وقت نزل السينما فنانيين عندهم رؤيه فنيه . و عندهم خبره فى فنون اخرى .. زى الكاريكاتير و الموسيقى و المسرح و التصوير .. و بدئوا يطبقوا خبرتهم دى فى السينما
و بكده كمان اتضحت اهميه السينما للدول و بدأت الرقابه عليها .. و هنا بقى كان الصراع على وظيفه السينما بين الحريه و الضرورة
و ظهرت اسئله زى هل السينما فن ولا صناعه ؟؟ و ايه بيميزها عن باقى الفنون ؟ و ظهرت اجابات كتير لدرجه اننا منقدرش نقولها كلها فى كتاب واحد 

لكنكن نختصرها فى ان السينما فن .. لغته الصور و قواعدها بتقوم على الحركة .. بمعنى ان السينما مش هتقولك ان البنت جميله لكن هتصورلك جمالها عن طريق الاحداث فى الفيلم .. كمان هى صناعه و ده مش عيب لان فيها جانب تقنى و هو الادوات و الكاميرات و التحميض و التسجيل و غيره
و فى لنهاية الكاتب بيقول ان الجدل حوالين وظيفه السينما هو اساس ظهور النقد السينمائى