بيبدأ الكاتب الفصل الاول بالكلام عن خدع لمدربين خيول بيقولوا فيها ان خيولهم تقدر تحسب .. و اكتشفنا فى النهاية انها مجرد خدع ..المهم فى المقدمه دى انها بتقسم البشر لفريقين .. فريق مؤمن ان الحيوان عنده قدرات عقليه شبيهه بالبنى ادم و فريق شايف ان الحيوان معندوش اى وعى حقيقى .
و سلوك الحيوان بيتلخص فى ( 1- الاغتذاء 2- طلب المأوى 3- العراك 4- الجنس 5- رعايه الصغار 6-الطرد و الاقصاء او النظافه 7- سلوك المحاكاه النوعيه ) و علشان يعمل الحيوان السلوكيات دى بيستخدم الموارد المتاحه قدامه من حواسة وقدراتة علشان يتكيف مع احتياجاتة
و هنا هنوصل لسؤال .. ايه الدافع لسلوك الحيوان ؟.. اولا السبب الفسيولوجى
الاغتذاء .. السبب فيه هو انقباض عضلات المعدة و قله مستوى السكر فى الدم .. لما بيحصل ده بيفضل الحيوان يدور على غذاء و برضه فيه مركز فى المخ اسمه (تحت السريرى ) لو اتشال جراحيا او اتوقفت اشاراته بيفضل الحيوان جعان على طول و بالتالى هو المسئول عن الشبع
العراك .. لو الكائن حس بخطر بيلجأ لحاجه من اتنين اما العراك او الهروب ..طبعا ده بسبب ضخ كميات من هرمون الادرينالين فى الدم .. و بنلاقى ان فيه مركزين فى المخ مؤثرين فى سلوك العراك هما القشره المخيه و المركز التحت السريرى ..كمان لقوا ان هرمون الذكورة بيزود القابليه للعراك
السلوك الجنسى هو الاوضح و ناتج من افراز الهرمونات الجنسيه ..و سلك الرعاية الابويه تأثير الفسيولوجيا عليه قليل لكن لقى بعض العلماء ان افراز اللبن عند الام بيأثر على السلوك دة ... اما سلوك طلب المأوى فطبعا مرتبط بالبرد و الحر
التعلم
اول وسيله للتعلم عن الحيوان هى التجربة و الخطأ و المؤثر الاساسى فيها هو الذاكره ..طول ما فى الذاكره ذكرى الخطأ فمش هيتكرر .. لكن لو الحيوان نسى الخطأ هيكررة .. كمان سلوك الافراد مختلف فمش كل افراد النوع هيحلوا المشكله بنفس الطريقة .. وبالنسبه لبعض الانواع العليا زى القرود و الكلاب مثلا بيبقى فيه نوع من التفكير قبل حل المشكله .. بمعنى ان الكلب عايز يوصل لمكان معين فبيقف الاول يفكر فى اكتر الطرق امانا علشان يوصل .. الموضع مش بس معتمد على التجربه و الخطأ
الذكاء
هو قدره الحيوان على حل مشكله بتواجهه لاول مره ..و بنشوف الذكاء اكبر فى الحيوانات العليا .. لدرجه ان القرده مثلا عندها القدره على استخدام الموارد المتاحة فى البيئه بتاعتها (ان القرد رص العلب فوق بعض علشان يطلع عليهم و يجيب موز من مكان عالى ) وبالنسبه لاستخدام الادوات فهو منتشر بين الحيوانات بعضهم علشان يبنى مسكن مثلا لكن الاعتماد عليها كليا ده خاص بالانسان بس
السلوك الاجتماعى
هو قدره الكائن انه ينظم نفسه اجتماعيا وكل فرد من المجموعه يعرف مقداره و وظيفته و بتختلف التنظيم على حسب ايه منهم حسب القوه او السن اوالنوع (ذكر و انثى) او فى الحشرات حسب النوع الشغالات و الملكه و الذكور و هكذا
لغة الحيوان
بنلاقى ان الطيور طورت لغه عن طريق اصواتها .. او ما يشبه اللغه .. اما الحيوانات فالموضوع يعتبر لغه جسد اكتر و تعبيرات الوش هما المؤثرين .. و الحشرات لغتها عباره عن مواد كيميائيه بتفرزها علشان تتفاهم بيها وتبعت اشارات لبعض
و اخيرا اى تفوق فى سلوك الحيوان بيؤدى الى توريثه و افضليته فى الانتخاب الطبيعى و اللى بيؤدى بعد زمن طويل لتطور كائنات مختلفة
و اخيرا اى تفوق فى سلوك الحيوان بيؤدى الى توريثه و افضليته فى الانتخاب الطبيعى و اللى بيؤدى بعد زمن طويل لتطور كائنات مختلفة
No comments:
Post a Comment